"Барселона" марказий ҳимоячиси Эрик Гарсияга янги шартнома таклиф қилинади.
Қишда футболчи Италиянинг "Комо" клубига кўчиб ўтиши мумкин эди, бироқ Ханс-Дитер Флик уни сақлаб қолишни талаб қилди. Diario Sport хабарига кўра, энди "Барселона" таянч зонасини ёпишга қодир бўлган 24 ёшли марказий ҳимоячи билан шартномани узайтирмоқчи. Футболчининг амалдаги меҳнат шартномаси келаси йилнинг ўртасида тугайди.
Эрик Гарсия жорий мавсум "кўк-анорранглилар" сафида жами 28 та ўйинда майдонга тушди ва ўз ҳисобига 3 та гол ҳамда 1 та голли узатма ёздириб қўйишга эришди. Ўтган мавсумда испаниялик ижара асосида "Жирона" шарафини ҳимоя қилган эди.
