"Барселона" форварди Роберт Левандовски бу мавсумда клуб ва терма жамоа сафида 40 та гол урган Европанинг топ-5 лигаларидан биридаги биринчи футболчига айланди.

Ла Лиганинг 29-туридан ўрин олган “Жирона”га қарши ўйинда (4:1) Роберт Левандовски дубль қайд этиб, Испания чемпионатида урган голлари сонини 25 тага етказди. Шунингдек, унинг жорий мавсумда иккита голли узатмаси борлигини ҳам таъкидлаш жоиз.

Умуман олганда, 36 ёшли польшалик ҳужумчи клуб ва терма жамоа сафида барча мусобақаларда 47 та ўйинда 40 та гол урди ва 5 та голли узатмани амалга оширди.

Роберт Левандовски "Олтин бутса" учун курашда 27 голга эга бўлган Муҳаммад Салоҳдан икки тўп ортда қолмоқда.