Эртага нима бўлади, деб юрак ҳовучлаб ўтирганимиз рост гап. Таъбир жоиз бўлса, ҳаёт-мамот масаласи. Ашаддий футбол мухлисларининг қўли ишга бормаётгани, ўн биринчи ўтсин, кейин бир гап бўлар, деб юрганлари қанча.

Миллий терма жамоамиз оғир ва машаққатли йўлни босиб ўтди. Айниқса, сўнгги босқичнинг илк ўйинини эслайлик. Шукрки, ҳамаси ортда қолди, йигитлар (терма жамоамиздаги барчани, мураббийлару техник ходимлар, ўйинчилару шифокорларни назарда тутмоқдаман) миллионлаб футбол мухлисларининг ишончларини оқлаб, уларга умидни қайтаришди. Биргина қадам қолди, ҳам оғир, ҳам уддаласа бўладигани. Йигитлар бу ишни Доҳанинг жазирамасидаю, тўлиб-тошган "Озодий"да ҳам уддалашди. Йигитларга ишончимиз катта. Жанублик корейслар мураббийининг бизни менсимайроқ турганию Эроннинг иштаҳаси очилгани ҳам бизни чўчита олмайди. Асосийси, миллий терма жамоамизнинг кучига ишонамиз, халқ дуода. Йигитларга минг раҳмат, ота-оналарига таъзимдамиз.

Аввалроқ эълон қилинган мақолалар остида қолдирилган айрим изоҳларда миллий жамоамиз ҳаққига дуолар қилишгани, Яратгандан ғалаба сўрашганини ўқиб, тўғриси кўзларимга ёш келиб кетди. Уларни ўқирканман Руслан Чагаевнинг жаҳон чемпиони бўлгани хаёлимга тушди. 14 май, жума куни эди чемпионлик жанги. Ўшанда ҳам Чагаевнинг чемпион бўлишини сўраб, дуо қилинганди. Халқнинг дуоси ижобат бўлди. Бу сафар ҳам қуруқ қайтармасин.