Белгиялик ярим ҳимоячи Кевин Де Брюйне "Манчестер Сити"ни тарк этиши ҳақида эмоционал баёнот берди. У жорий мавсум охирида "шаҳарликлар"ни тарк этади.
“Ҳурматли Манчестер!
Бу хатни кўрганингиздан сўнг, бу қаерга кетаётганини тушунган бўлсангиз керак. Шунинг учун мен гапни қисқартираман ва барчангизга шуни айтиб ўтаманки, бу менинг "Манчестер Сити" футболчиси сифатидаги сўнгги ойларим бўлади.
Бу ҳақда ёзиш осон эмас, лекин футболчи сифатида ўша кун эртами-кечми келишини ҳаммамиз биламиз. Кун келди ва сиз биринчи навбатда мендан эшитишга лойиқсиз.
Футбол мени барчангизга ва шу шаҳарга олиб келди. Бу давр ҳаётимни ўзгартиришини билмаган ҳолда орзум ортидан кетаётгандим. Бу шаҳар. Бу клуб. Бу одамлар... менга ҲАММА нарсани берди.
Хоҳлаймизми ёки йўқми, хайрлашиш вақти келди. Манчестер фарзандларимнинг паспортларида, энг муҳими, ҳар бир оила аъзойимнинг қалбида абадий қолади. Бу ҳар доим бизнинг уйимиз бўлади. Ушбу ўн йиллик саргузашт учун шаҳар, клуб, ходимлар, жамоадошлар, дўстлар ва оила аъзоларига етарлича миннатдорчилик билдира олмаймиз.
Аммо ҳар бир ҳикоянинг охири бор. Бу энг яхши бўлим эди. Келинг, сўнгги дақиқаларни бирга ўтказайлик!
Катта муҳаббат билан, сизнинг Кевинингиз”, - деб ёзди Де Брюйне ижтимоий тармоқларида.
