"Ливерпуль" ҳужумчиси Муҳаммад Салоҳ вазиятни ўзгартиришни режалаштирмаяпти. Тарқалган маълумотларга кўра, мисрлик "қизиллар" билан янги икки йиллик шартнома тузиш арафасида. Маълумки, форварднинг трансферига Саудия клублари анчадан буён қизиқиш билдирмоқда. Журналист Крис Бескомбнинг маълум қилишича, футболчи Саудия Арабистони чемпионати вакилларига маҳаллий клубларнинг ҳеч бирига ўтмаслигини маълум қилган.
Муҳаммад Салоҳ "Ливерпуль"да ажойиб мавсум ўтказмоқда: унинг ҳисобида барча мусобақаларда Арне Слот жамоаси сафида 45 та ўйинда 32 та гол ва 22 та голли узатма бор. Июнь ойида мерсисайдликлар юлдузи 33 ёшга тўлади.
