Туркиянинг "Галатасарой" клуби раҳбарияти жамоа форварди Виктор Осимхенни жамоада қолишга кўндирмоқчи. Бу ҳақда журналист Экрем Қонур хабар бермоқда.
Эслатиб ўтамиз, 26 ёшли нигериялик футболчи "Галатасарой" сафида ижара асосида тўп тепмоқда. Футболчининг шартномаси "Наполи"га тегишли.
Манбага кўра, турк жамоаси Осимхенни олиб қолишни истамоқда, аммо бошқа топ-клубларнинг молиявий таклифларини синдира олмайди. Шу билан бирга, ҳужумчининг ўзи ҳам кучлироқ Европа жамоасида ўйнашни хоҳлайди, дея таъкидлайди манба.
Осимхен жорий мавсум барча мусобақаларда 33 та учрашувда қатнашиб, 29 та гол урди ва 6 та голли узатмага муаллифлик қилди.
