"Бавария" ҳужумчиси Харри Кейн Мюнхенда бўлиб ўтган Чемпионлар лигаси 1/4 финал биринчи ўйинидаги ғалабадан сўнг "Интер" футболчиларининг хатти-ҳаракатига тўхталди.
"Нерадзуррилар" ўтган сешанба куни "Аллианц Арена"да 2:1 ҳисобида ғалаба қозонишди.
Ўйиндан кейинги интервьюсида Кейн "Интер" эрта байрам қилаётганини айтди.
"Балки бу шунчаки ҳис-туйғулардир, лекин менга "Интер" эрта байрам қилаётгандек туюлди.
Ҳозир бу гаплар унчалик муҳим эмас деб ўйлайман, барибир "Интер" футболчиларини ва бутун клубни жуда ҳурмат қиламан.
Сўнгги дақиқаларда гол ўтказиб юборсангиз, ҳис-туйғуларингизни жиловлаш қийин. Кўп жамоалар "Альянц Арена"да "Бавария"ни мағлуб эта олишмайди, шунинг учун эртага "Сан-Сиро"да биз уларни мағлуб этсак, жуда хурсанд бўламиз", – деди Кейн матбуот анжуманида.
