Ханси Флик футболчиларнинг ўйин вақти камлигидан норозилиги ҳақида гапирди.
Ла Лига доирасида "Барселона"нинг "Сельта" устидан қозонилган ғалабаси (4:3) вақтида Ансу Фати захирадан майдонга тушмаслигини билиб, сув қутисини тепди. Каталониялик вингер ноябрь ойидан бери Испания чемпионатида ўйнамади.
"Мен ўйинчиларнинг норозилигини тушунаман. Мен профессионал футболчи бўлганман ва уларни тушунаман. Ҳамма жамоанинг бир қисми бўлиши ва ҳисса қўшиши мумкинлигини кўрсатишни истайди. Мен буни тушунаман, аммо муносабатни тушунмаяпман. Бу қабул қилиниши керак бўлган вазият.
Биз "Сельта"га қарши ажойиб камбек қилдик. Ва биз тўғри қарор қилдик. Кейин нима бўлишини эмас, футболчилардан яхши муносабат кўришни истаймиз", деди “Барселона” бош мураббийи.
