“Манчестер Юнайтед” ярим ҳимоячиси Каземиро футболдаги муваффақиятининг сири нимада эканини очиқлади. Бразилиялик футболчи яқин орада яна бир соврин — Европа Лигаси Кубогини қўлга киритиш имконига эга. Жума куни “қизил иблислар” ярим финал жавоб учрашувида “Атлетик”га қарши илк ўйиндаги 3:0 ҳисобидаги устунликни сақлаб қолишга ҳаракат қилади.
“Мен жуда кўп ютуқларга эришдим, лекин янада кўпроғини хоҳлайман. Бу — ғолиблар ҳаёт тарзи. Одамлар фақат 90 дақиқалик ўйинни кўришади, аммо мен доим такрорлайман: "Ўйин — бу сен кундалик ҳаётда қилган ишингнинг аксидир".
Мен доим ишлайман. Қандай вазиятда бўлмасин — ўйнаётганим ёки йўқ — энг муҳими, “Манчестер Юнайтед”нинг ғалабасидир. Агар жамоа ютса, демак мен ҳам ютдим. Бу шахсий муваффақият эмас, бу “Юнайтед”нинг ғалабалари ҳақида. Мен бу йўлда қўлимдан келган барча ёрдамни беришни истайман. Шунинг учун ҳам карьерам давомида бу даражага ета олдим”, — деди Каземиро UtdDistrict нашрига.
