“Manchester Yunayted” yarim himoyachisi Kazemiro futboldagi muvaffaqiyatining siri nimada ekanini ochiqladi. Braziliyalik futbolchi yaqin orada yana bir sovrin — Yevropa Ligasi Kubogini qo‘lga kiritish imkoniga ega. Juma kuni “qizil iblislar” yarim final javob uchrashuvida “Atletik”ga qarshi ilk o‘yindagi 3:0 hisobidagi ustunlikni saqlab qolishga harakat qiladi.
“Men juda ko‘p yutuqlarga erishdim, lekin yanada ko‘prog‘ini xohlayman. Bu — g‘oliblar hayot tarzi. Odamlar faqat 90 daqiqalik o‘yinni ko‘rishadi, ammo men doim takrorlayman: "O‘yin — bu sen kundalik hayotda qilgan ishingning aksidir".
Men doim ishlayman. Qanday vaziyatda bo‘lmasin — o‘ynayotganim yoki yo‘q — eng muhimi, “Manchester Yunayted”ning g‘alabasidir. Agar jamoa yutsa, demak men ham yutdim. Bu shaxsiy muvaffaqiyat emas, bu “Yunayted”ning g‘alabalari haqida. Men bu yo‘lda qo‘limdan kelgan barcha yordamni berishni istayman. Shuning uchun ham karyeram davomida bu darajaga yeta oldim”, — dedi Kazemiro UtdDistrict nashriga.
