Клублар ўртасидаги жаҳон чемпионати арафасида “Реал”ни бошқарадиган испаниялик мутахассис Хаби Алонсо янги жамоаси учун трансфер кампаниясини режалаштира бошлади, деб хабар беради Marca.
Янги мураббий биринчи навбатда ярим ҳимоячи Лука Модрични таркибда сақлаб қолмоқчи. 39 ёшли хорватияликнинг шартномаси 2025 йилнинг июнида якунига етади ва “қаймоқранглилар” раҳбарияти унинг ёши улғайгани учун шартномани узайтирмасликка қарор қилган.
Шу сабабдан Алонсо "қироллик клуби"дан қарорини ўзгартиришни ва Модричга янги бир йиллик шартнома таклиф қилишни сўради.
Футболчининг ўзи 2026 йилда бўлиб ўтадиган жаҳон чемпионатидан сўнг фаолиятини "Сантьяго Бернабеу"да якунлашни орзу қилмоқда.
Мадридда қолиш учун Лука маошини сезиларли даражада камайтиришга тайёр. Алонсо раҳбарият унинг фикрига қулоқ солиб, машҳур фахрий билан ҳамкорликни келаси йилнинг июнига қадар давом эттиришга рози бўлишига умид қилмоқда.
