"Барселона" футболчилар билан янги шартномалар тузишда давом этмоқда. Сўнгги вақтларда Каталония гранди кўплаб муҳим футболчилар, жумладан, Ламин Ямал билан шартнома узайтирилганини эълон қилди - сешанба куни унинг шартномаси расман узайтирилди. Нуфузли инсайдер Фабрицио Романонинг хабар беришича, кейингиси - Марк Берналь. Яқинда 18 ёшини нишонлаган хавбек тез орада ҳужжатларга имзо чекади - битим 2029 йилнинг ўрталарига қадар мўлжалланган бўлади.

Марк Берналь 2024/25 йилги мавсум бошида "Барселона"нинг асосий жамоаси сафида учта ўйин ўтказди, шундан сўнг хочсимон боғламининг ёрилиши туфайли сафдан чиқди. Ёш юлдузнинг тўлиқ сафга қайтиши август ойига режалаштирилган.