Англия футбол ассоциацияси ўйинлардаги гаровда фойда олиш учун атайлаб сариқ карточка олганликда айбланаётган "Вест Хэм" футболчиси Лукас Пакета билан боғлиқ шов-шувли ишни якунлаш арафасида.
Гумонланувчи Пакета 2022 йилнинг ноябридан 2023 йилнинг августига қадар “Лестер”, “Астон Вилла”, “Лидс” ва “Борнмут”га қарши ўйинларда олган тўртта сариқ карточкаси сабаб тергов қилинди.
Футболчининг ўзи барча олтита банд бўйича айбини тан олмади. Англия футбол ассоциацияси агар у айбдор деб топилса, Пакетани умрбод дисквалификация қилмоқчи эди. Иш яна 4-5 ҳафта давомида кўриб чиқилади.
Терговга қарамай, Пакета "Вест Хэм"да ўйнашда давом этмоқда. Ўтган мавсумда у лигада 33 та ўйинда майдонга тушиб, 4 та гол урди ва 10 та сариқ карточка олди.
