Ҳужумчи Рандаль Коло-Муани клублар ўртасидаги жаҳон чемпионатида "Ювентус" сафида ўйнашини тасдиқлади.

"Миллий жамоада ҳам, клубимда ҳам бироз кўпроқ ўйнай олганимдан жуда хурсандман. "Ювентус"да жуда бахтлиман, у ерда ўйнашда давом этишдан умидворман, улар мени яхши кутиб олишди, бу менга ёқади. Улар билан клублар ўртасидаги жаҳон чемпионатига бораман," - дея футболчининг сўзларини келтиради L’Equipe.

Ҳужумчи Италия клуби томонидан "ПСЖ"дан 2025 йилнинг 30 июнига қадар ижарага олинган. Футболчининг парижликлар билан шартномаси 2028 йилнинг июнь ойи охиригача мўлжалланган.

26 ёшли француз январь ойи охирида "Ювентус" сафига келиб қўшилганди. Ўтган мавсумда футболчи клуб сафида 19 та ўйинда майдонга тушиб, 8 та гол урган ва 2 та голли узатмани амалга оширган.