Португалия терма жамоаси аъзолари Нуну Мендеш, Витинья, Жоау Невеш ва Гонсалу Рамуш Миллатлар Лигаси финалида Испания терма жамоасини мағлуб этишди (2:2, 5:4 - пенальти).
Тўрт футболчи учун бу мавсумдаги бешинчи титул бўлди: бунгача улар "ПСЖ" таркибида Франция чемпиони, мамлакат кубоги ва суперкубоги соҳиби, шунингдек, Чемпионлар лигаси ғолиби бўлишганди.
Испания терма жамоаси сафида ҳам "ПСЖ" футболчиси - ярим ҳимоячи Фабиан Руис тўп тепади.
Португалия тарихда иккинчи марта Миллатлар лигаси ғолибига айланди. У биринчи марта 2019 йилда финалда ғолиб чиққан. Испанлар турнир финалида иккинчи марта мағлуб бўлишди - аввалроқ бу 2021 йилда Францияга қарши ўйинда содир бўлганди.
