Ҳамкоримиз uzfootball.uz сайтининг ўз твиттерида маълум қилишича, Ўзбекистон Осиёда ЖЧ-2014 саралаш кампаниясини умумий ҳолда олганда энг кўп очко тўплашга муваффақ бўлган.

Терма жамоамиз иккинчи босқичдан курашга киришди ва шу кунгача 11 ғалаба, 3 дуранг ва 2 мағлубият қайд этган ҳолда, 36 очко жамғаришга муваффақ бўлган. Тўплар нисбати - 26:7.

ЖЧ-2014нинг Осиёдаги ҳаракати норасмий жадвали қуйидагича кўриниш олган:
1. Ўзбекистон - 36 очко
2. Эрон - 34
3. Австралия - 28
4. Япония - 27
5. Ж.Корея - 27

Терма жамоамизнинг бу сафарги ЖЧ саралашидаги тўпурари Баҳодир Насимов бўлди - 4та гол. Шунингдек, Александр Гейнрих, Санжар Турсунов, Сервер Жепаров, Улуғбек Бақоевлар ҳисобида 3тадан гол бор бўлса, Одил Аҳмедов 2 марта рақиблар дарвозасини ишғол қилди.

Осиёдаги тўпурар эса Япония терма жамоаси аъзоси Шинжи Оказаки бўлган - 8та гол. Ундан кейинги ўринларни қуйидаги футболчилар 7та гол билан эгаллашган: Аҳмад Хайёл, Хасан Абдулфаттоҳ, Юнус Маҳмуд, Винх.

Ўзбекистон терма жамоаси, шунингдек, сафарда ўтказган ўйинларда ҳам ҳаммадан кўп очко жамғарган - 19. Меҳмонда термамиз 6 ғалаба, 1 дуранг ва 1 мағлубият қайд этган, тўплар нисбати 9:2ни ташкил этмоқда. Ушбу жиҳатдан Осиё саралаши жадвали мана бундай:
1. Ўзбекистон - 19 очко
2. Эрон - 17
3. Япония, Австралия, Ироқ - 11
6. Ж.Корея - 9.

Энди уйдаги учрашувлар натижаларидан келиб чиқиб жадвал тузсак:
1. Иордания - 19 очко
2. Ж.Корея - 18
3. Эрон, Ўзбекистон, Австралия, Уммон - 17

Яна бир факт, биз Эрон билан биргаликда саралашда энг кам гол ўтказиб юборган жамоа бўлдик - 16 ўйинда 7 гол.

Шунақа гаплар. Шундай устунликларга эга бўлиб ҳам ЖЧга чиқмаслик мумкин, ха, буни биз исботлаб беряпмиз...