Жаҳон лигалари ассоциацияси бош котиби Жером Перлемутер, ташкилот мутахассиси Станислав Штипков, Чехия футбол лигаси ижрочи директори Томас Барта ҳамда ЎзПФЛ бош директори Диёр Имомхўжаев Ўзбекистон футбол ассоциациясига ташкилот биринчи вице-президенти Равшан Эрматов билан учрашув учун келди.
ЎФА ҳамда ЎзПФЛ ўртасидаги алоқалар учрашувнинг асосий мавзуси бўлди. Сир эмаски, Ассоциация ҳамда Лига ўтган 5 йил давомида катта ҳажмдаги ишни бажарди ва бу албатта терма жамоалар натижаларида ҳам акс этди.
Сир эмаски, 2020 йилдан бошлаб ЎзПФЛ U19 чемпионатини йўлга қўйди. Бугунга келиб Суперлига ва Пролиганинг барча клублари мазкур чемпионатда ўз жамоаси билан иштирок этмоқда. Ўрта ҳисобда 800 га яқин 15 ёшдан 19 ёшгача бўлган иқтидорли футболчиларни қамраб олган мусобақа ёшлар футболининг янги даражага чиқишига замин яратди. Хусусан, 2018 йил Ўзбекистон U17 терма жамоаси Осиё чемпионатининг саралаш босқичини муваффақиятсиз якунлаган бўлса, 2023 йилда жамоамиз мусобақанинг ярим финалига қадар етиб борди, 2025 йилда эса чемпионликни қўлга киритди.
U21 чемпионатининг ислоҳ қилиниши эса Ўзбекистон U20 терма жамоаси учун селекция жараёнини осонлаштирди. 2023 йилда жамоамиз қитъа кубогининг соҳибига айланди. ЖЛА делегация бу йўлда босиб ўтилган қадамлар билан таништирилди. ЎФА томонидан тайёргарлик босқичида амалга оширилган ишлар кўрсатилди. Сир эмаски, бугунга келиб Ўзбекистоннинг ёшлар терма жамоалари ўндан зиёд хорижий йиғинларда иштирок этади ҳамда УЕФА, КОНМЕБОЛ каби конфедерацияларнинг кучли терма жамоаларига қарши кураш олиб боради.
Шунингдек, "Олимпик" лойиҳаси, унинг Про лига ва Суперлигадаги иштироки, якунда Ўзбекистон ўз тарихида илк бор Олимпиада йўлланмасини қўлга киритгани, Суперлиганинг сўнгги йилларда жонланиши, миллий терма жамоамизнинг Жаҳон чемпионати йўлланмасига қай тариқа эга чиққани тушунтириб ўтилди.
Йиғилиш якунида ЖЛА делегацияси самимий учрашув учун ЎФА раҳбариятига миннатдорчилик билдирди.
