Ўзбекистон кубогининг нимчорак финалидан ўрин олган 2 та учрашув 18 июнь, чоршанба куни ўтказилди.

Жумладан, “Шўртан” Ғузорда “Арал”ни қабул қилган бўлса, “Қўқон-1912” ўз майдонида “Бунёдкор” билан ўйин ўтказди.

Ғузордаги баҳс мезбонлар устунлиги остида ўтди ва натижа ҳам шунга яраша бўлди. Биринчи бўлимнинг ўзида “Шўртан” иккита гол фарқи билан олдинга чиқиб олди. Иккинчи бўлимда жами учта гол урилган бўлса, уларнинг биттаси меҳмонлар ҳисобига бўлди.

Шундай қилиб, ғузорликлар чорак финалга йўл олди.

Қўқондаги баҳс эса анча қийин ўтди. 45+2-дақиқада Жавоҳир Ҳусанов ҳисобни очди. Иккинчи бўлим аввалида – 49-дақиқада эса Носиржон Абдусаломов ҳисобни тенглаштирди.

Ўйин якунига қадар шу ҳисоб сақланиб қолди. Қўшимча вақтларда ҳам гол урилмади ва пенальтилар сериясида ғолиб номи аниқланди. Унда тошкентликлар устун келди ва чорак финал йўлланмасини қўлга киритди.

Ўзбекистон кубоги, нимчорак финал
18 июнь, чоршанба
“Шўртан” — “Арал” 4:1
Голлар: Темур Мамасиддиқов, 27 пен (1:0), Нуриддин Ҳасанов, 41 (2:0), Дониёр Нарзуллаев, 60 (3:0), Зулпуқар Қуанишбаев, 87 (3:1), Асадбек Саитхонов, 90+3 (4:1)

“Қўқон-1912” — “Бунёдкор” 1:1 (пенальтилар серияси – 4:5)
Голлар: Жавоҳир Ҳусанов, 45+2 (1:0), Носиржон Абдусаломов, 49 (1:1)