"Реал Мадрид" ва бош мураббий Хаби Алонсо бразилиялик ҳужумчи Родригонинг ёзда жамоадан кетишига қарши эмас.

Родриго ўтган мавсум охирида Карло Анчелотти қўл остида камдан-кам ўйнади ва клуб футболчининг машғулотларда баъзида етарлича мотивация бўлмаганидан хавотир билдирган, гарчи унинг атрофидагилар буни доим рад этишган.

Родригонинг отаси ва агенти Эрик Гоис ўғлининг "Реал"даги аҳволидан шикоят қилди, у ерда баъзида Килиан Мбаппе, Винисиус Жуниор ва Жуд Беллингем юлдуз триосининг соясида қолди. Бу гаплар клуб раҳбариятига ёқмади ва бу футболчининг ёмон ўйини билан биргаликда "Реал Мадрид" энди ҳужумчини сотиш имкониятига очиқ бўлишига олиб келди.

Якуний қарор эса янги мураббийда қолди ва клублар ўртасидаги жаҳон чемпионати олдидан жамоани қабул қилиб олган Алонсо, агар муносиб таклиф тушса, футболчининг кетишига тўсқинлик қилмасликка қарор қилди.

Родриго хизматларига "Арсенал" қизиқиш билдирмоқда. Охирги ҳафталарда лондонликлар футболчи вакиллари билан дастлабки музокаралар олиб бориб, бразилияликни трансфер қилиш имкониятларини баҳолашди.