"ПСЖ" ва Португалия терма жамоасининг марказий ярим ҳимоячиси Витинья Франция чемпионатини тарк этиб, Испания Ла Лигасига ўтиши мумкин. Бу ҳақда Fichajes журналистлари хабар бермоқда.
Манба маълумотларига кўра, 25 ёшли футболчини ўз сафига қўшиб олишдан Мадрид "Реал"и манфаатдор. Жамоанинг янги бош мураббийи Хаби Алонсо португалиялик ўйинчини хорват Лука Модричнинг ўрнини босувчи деб ҳисобламоқда. "Қаймоқранглилар" Витинья учун ярим ҳимоячи Эдуардо Камавинга ва 100 миллион евро таклиф қилишга тайёр.
"ПСЖ" эса ўз навбатида португалиялик футболчини қўйиб юбориш ниятида эмас. Витинья жамоанинг етакчи ўйинчиларидан бири ҳисобланади. Ярим ҳимоячи парижликлар билан 2027 йилнинг ўрталаригача шартнома имзолаган.