Бугун Самарқанд ва Тошкентда Суперлига 15-турининг икки марказий баҳси бўлиб ўтади.

20:00. “Динамо” – “Насаф”

Турнинг яна бир марказий ўйинларидан бири Самарқандда ўтади. Жадвалда дастлабки икки ўринни эгаллаб турган клублар баҳсига қизиқиш шубҳасиз катта. Аммо 2 июль куни “Динамо” 7-турнинг қолдирилган учрашувида ўз уйида “Нефтчи”га ютқазди. Натижада Абрамов шогирдлари мавсумдаги иккинчи мағлубиятини қабул қилиб олди. Чемпионатда биргина мағлуб бўлмаган “Насаф” қолди. Табиийки, Рўзиқул Бердиев шогирдлари бугун енгилмаслик учун ҳаракат қилади.

Ҳозирча ўйинда тенглик дейиш мумкин. Ҳар ҳолда бугун мезбонлар ўз мухлислари қаршисида енгилмаслик учун ҳаракат қилади.

20:00. “Пахтакор” – “Навбаҳор”

Навбатдаги эътибор марказида бўлган ўйинлардан бири Тошкентда “Пахтакор” ва “Навбаҳор” ўртасида кечади. Сергей Лушчан бошчилигидаги “Навбаҳор” бу йил “йиритқич”га айланди. Чемпионатда энг кўп гол урган жамоа “Навбаҳор” бўлиб турибди – 30. Ундан кейин эса “Пахтакор”  29 та гол. Демак, ҳужумкор ва голлар уришни ёқтирадиган клублар ўртасида биз яна голлар шоусини кўрсак ажаб эмас. “Пахтакор” Камолиддин Тожиев бошчилигида ҳали ютқазгани йўқ. “Навбаҳор”га муаммо туғдиришга ҳаракат қилади. “Навбаҳор” ўз майдонида даҳшатли кўрсаткичларни қайд этмоқда. Сафарда ҳам буни такрорлашга уриниб кўради. Хуллас, дербига мос ўйин бўлади. Қолганини ўйин давомида билиб оламиз.