Мадриднинг "Реал" клуби футболчиси Гонсало Гарсия Европанинг ўнлаб клублари эътиборини тортди.
El Chiringuito TV телеканали хабарига кўра, мадридлик ҳужумчига Англия, Италия ва "Испаниянинг ярми" жамоалари қизиқиш билдирмоқда.
Таъкидланишича, 21 ёшли футболчига аллақачон ўнта трансфер таклифи тушган.
Аввалроқ у клублар ўртасидаги жаҳон чемпионати тўпурарлари пойгасида етакчилардан бирига айланганди. "Реал Мадрид" форварди турнирда 4 та гол урди.
Шу билан бирга, El Chiringuito TV хабарига кўра, испаниялик футболчига "Лос-Бланкос"нинг асосий таркибидан жой олиш ҳали кафолатланмаган. Ҳаммаси шуни кўрсатмоқдаки, мураббий ва раҳбарият жароҳати туфайли ҳали жаҳон чемпионатида иштирок этмаган Эндрик ва Гарсия ўртасида танлов қилишига тўғри келади.
Эслатиб ўтамиз, Гарсиянинг шартномасида товон пули 50 миллион еврони ташкил этади.
