Ярим ҳимоячи Жордан Хендерсонни тез орада яна Англия Премьер-лигасида кўриш мумкин бўлади. Нуфузли инсайдер Фабрицио Романонинг ижтимоий тармоқларда ёзишича, 35 ёшли Хендерсон аллақачон тиббий кўрикдан ўтган ва "Брентфорд" билан икки йиллик шартнома имзолаган. Тез орада битим ҳақида расман эълон қилинади.
"Брентфорд" сафида Жордан Хендерсон Кристиан Нергорнинг ўрнини эгаллаши керак.
Эслатиб ўтамиз, Хендерсон бир ярим мавсумни "Аякс"да ўтказган ва бир неча кун олдин клубни тарк этганди. Шунга кўра, "Брентфорд" тажрибали англиялик футболчини эркин агент сифатида ўз сафига қўшиб олади.













