"Алавес" "Реал" тарбияланувчиси Юссеф Энрикесни ўз сафига қўшиб олди.

19 ёшли ҳимоячининг шартномаси 2029 йилнинг июнигача мўлжалланган.

Defence Central хабарига кўра, мадридликлар футболчининг 50% ҳуқуқи учун 3 млн евро олган. Бундан ташқари, "қаймоқранглилар" кейинги икки мавсум давомида қайта сотиб олиш ҳуқуқини сақлаб қолади.

Энрикес ўтган мавсумда "Кастилья"нинг асосий футболчисига айлангунига қадар "Реал"нинг барча ёшлар жамоаларида ўйнаган. У ўринбосарлар жамоасида жами 35 та ўйинда майдонга тушиб, 1 та гол урган ва 4 та голли узатмани амалга оширган. Шунингдек, футболчи Ла Лига ва Чемпионлар Лигасида бир неча бор мадридликларнинг асосий жамоаси қайдномасига киритилган.

Бундан ташқари, ҳимоячи Марокашнинг 20 ёшгача бўлган терма жамоасида ўйнаган ва 18 ёшида асосий жамоага чақирилган.