"Барселона" дарвозабони Марк-Андре тер Штеген 24 июлга қадар белида жарроҳлик амалиёти ўтказиш-ўтказмаслиги борасида бир қарорга келиши керак, деб ёзади AS.

Қайд этилишича, 33 ёшли дарвозабоннинг белидаги оғриқ жамоа билан машғулот ўтказишга тўсқинлик қилмоқда, шу боис клуб жарроҳлик амалиётини ўтказишни талаб қилмоқда. Бироқ футболчининг ўзи буни истамаяпти ва ўз ҳиссиётларига ишонч ҳосил қилиш учун бироз вақт беришни сўради.

Бундан ташқари, жамоа тер Штегеннинг таътилдан қайтганидан кейинги ноодатий хатти-ҳаракатларига эътибор қаратди. Манбалардан бирининг таъкидлашича, дарвозабон сўнгги бир неча кун ичида ўзини жуда ғалати тутмоқда ва ҳамма нарсадан шикоят қилмоқда. Тахминларга кўра, футболчининг бундай хатти-ҳаракатига бош мураббий Ханс-Флик билан яқинда бўлиб ўтган суҳбат сабаб бўлган бўлиши мумкин, у тер Штегенга у энди жамоанинг асосий дарвозабони эмаслигини айтган.

Тер Штеген "Барселона" сафида 2014 йилдан буён тўп тепиб келмоқда. 2024/25 йилги мавсумда у "кўк-анорранглилар" сафида барча мусобақаларда 9 та ўйинда майдонга тушиб, 11 та гол ўтказиб юборди ва 1 та ўйинда дарвозаси дахлсизлигини сақлаб қолди.