Италиялик ҳужумчи Матео Ретеги "Аталанта"ни тарк этди ва Саудия Арабистонининг "Ал-Қодисия" клуби билан шартнома имзолади.
Трансфер суммаси 67 млн еврони ташкил этди. Келишув 2028 йилгача мўлжалланган. Саудия Арабистони клубига ўтганидан сўнг 26 ёшли ҳужумчи клуб ва мухлисларга ўтказган вақти учун миннатдорчилик билдирди:
"Аталанта"га бу ажойиб йил учун раҳмат. Шундай катта клубнинг бир қисми бўлиш шарафига муяссар бўлдим. Мураббийлар ва шифокорлардан тортиб, ҳар куни бизга қулайлик яратиб берган ходимларгача - барчадан миннатдорман. Раҳбариятга ишонч учун, шерикларимга эса қўллаб-қувватлаш ва муҳит учун алоҳида раҳмат. Бу босқич менинг қалбимда қолади. Илиқлик ва ғурур билан кетаман. Олға, "Аталанта"! - деб ёзди Ретеги ижтимоий тармоқда.
Ўтган мавсумда Ретеги 25 та гол билан А Сериянинг энг яхши тўпурари бўлди ва "Аталанта" сафида жами 49 та ўйин ўтказиб, 28 марта рақиблар дарвозасини ишғол қилди ва шерикларига 10 та голли узатмани амалга оширди.
