Italiyalik hujumchi Mateo Retegi "Atalanta"ni tark etdi va Saudiya Arabistonining "Al-Qodisiya" klubi bilan shartnoma imzoladi.
Transfer summasi 67 mln yevroni tashkil etdi. Kelishuv 2028 yilgacha mo‘ljallangan. Saudiya Arabistoni klubiga o‘tganidan so‘ng 26 yoshli hujumchi klub va muxlislarga o‘tkazgan vaqti uchun minnatdorchilik bildirdi:
"Atalanta"ga bu ajoyib yil uchun rahmat. Shunday katta klubning bir qismi bo‘lish sharafiga muyassar bo‘ldim. Murabbiylar va shifokorlardan tortib, har kuni bizga qulaylik yaratib bergan xodimlargacha - barchadan minnatdorman. Rahbariyatga ishonch uchun, sheriklarimga esa qo‘llab-quvvatlash va muhit uchun alohida rahmat. Bu bosqich mening qalbimda qoladi. Iliqlik va g‘urur bilan ketaman. Olg‘a, "Atalanta"! - deb yozdi Retegi ijtimoiy tarmoqda.
O‘tgan mavsumda Retegi 25 ta gol bilan A Seriyaning eng yaxshi to‘purari bo‘ldi va "Atalanta" safida jami 49 ta o‘yin o‘tkazib, 28 marta raqiblar darvozasini ishg‘ol qildi va sheriklariga 10 ta golli uzatmani amalga oshirdi.
