Мюнхеннинг "Бавария" клуби қанот ҳужумчиси Брайан Сарагоса Жозе Моуриньонинг ўзи қизиқиш билдираётганига қарамай, Туркиянинг "Фенербахче" клуби таклифини рад этди.
Бу ҳақда Kicker нашри хабар бермоқда. Манбанинг ёзишича, катта таклифга қарамай, Сарагоса Истанбулга кўчиб ўтишдан бош тортишга қарор қилди.
"Бавария" раҳбарияти футболчини шу трансферлар давридаёқ тўлиқ сотиш ва ижарага бериш масаласини кўриб чиқиб, у билан хайрлашмоқчи. Шу билан бирга, бошқа клубларнинг аксарияти айнан ижара вариантига мойиллик билдирмоқда.
Ўтган мавсумда Брайан Сарагоса мюнхенликлар сафида 28 та ўйинда майдонга тушиб, 1 та гол урди ва 6 та голли узатмани амалга оширди. Унинг клуб билан шартномаси 2029 йилнинг ёзигача мўлжалланган. Transfermarkt маълумотларига кўра, футболчининг бозор нархи 12 млн еврони ташкил қилади.
