Италиянинг "Наполи" клуби янги стадион қуриш зарурлигини эълон қилди. Тегишли баёнот Италиянинг амалдаги чемпионлари расмий сайтида эълон қилинди.

Клуб, УЕФА ва Италия футбол федерацияси вакиллари иштирокидаги сўнгги учрашувда 2032 йилги Европа чемпионати ўйинларининг бир қисмини ташкил этиш мақсадида "Наполи"нинг ҳозирги стадионини реконструкция қилиш варианти муҳокама қилинди.

Натижада томонлар арена ҳар қандай ҳолатда ҳам хавфсизлик талабларига жавоб бермайди ва "Наполи" янги стадион қуриши керак деган хулосага келишди.

Клуб раҳбарияти уни шаҳарнинг энг ривожланмаган ҳудудларидан бирида қуриш ниятида, бу қурилиш билан боғлиқ баъзи муаммоларни камайтиради ва шу билан бирга ушбу ҳудудга янги ҳаёт бағишлайди.