"Барселона" янги келган футболчилар - "Манчестер Юнайтед"дан ижарага олинган Маркус Рэшфорд ва Жоан Гарсияни рўйхатдан ўтказиш учун ўзининг истиқболли футболчиларидан бирини сотишни режалаштирмоқда.
Mundo Deportivo нашри хабар беришича, молиявий чекловлар 1:1 ҳисобидаги қоидага қайтганига қарамай, "кўк-анорранглилар"нинг трансфер бозорида эркин ҳаракат қилишига халақит бермоқда.
Клуб шартномаси 2027 йилгача амалда бўлган 19 ёшли Ян Вирхили билан хайрлашишга тайёр. Ёш ҳужумчи ҳозирча асосий жамоада бирорта ҳам ўйин ўтказмаган, бироқ "Мальорка" ва "Жирона" каби клублар эътиборини тортган. Шу билан бирга, каталонияликлар футболчининг тақдири устидан назоратни сақлаб қолишни истайди ва Пабло Торреда бўлгани каби ижарага бериш ёки қайтариб сотиб олиш опцияси билан трансфер вариантини кўриб чиқмоқда.
Вирхилининг сотилиши бу мавсумда "Барселона"да дебют ўйинларини ўтказиш истагида бўлган Рэшфорд ва Гарсияни рўйхатдан ўтказиш учун калит бўлиши мумкин. Ханси Флик шогирдлари ўтган йилги Ла Лигадаги ғалабадан сўнг Испаниядаги етакчи мавқеини сақлаб қолишга ва мавсум бошланишидан олдин таркибни кучайтиришга умид қилмоқда.
