"Андижон" клубининг янги трансферлари орасида иқтидорли ҳимоячи Шахзод Азмиддинов ҳам бор.
Футболчи "Бургутлар" оиласининг бир бўлагига айланган ҳолда иккинчи даврага тайёргарликни бошлаб юборган. Жамоа ҳам уни бошқалар қатори илиқ қарши олди.
Азмиддинов "Андижон"даги биринчи ўтказган машғулотидан сўнг клуб матбуот хизматига дастлабки интервьюсини берди.
- "Пахтакор"дан "Андижон"га кўчиб ўтдингиз. Барчаси қандай юз берди?
- "Андижон" жамоасига қўшилганимдан хурсандман. Бу ерга ўтишимни катта сабабчиси бош мураббий Максим Александрович бўлади. Мен ушбу мутахассис билан уч йил бирга ишлаганман. Яхши биламан. Ўзим ҳам ушбу жамоага ўтишни ва Максим Александрович қўл остида тўп суришни анча хоҳладим. Албатта, ўтишим осон бўлмади. Охири томонлар келишувга эришишди. Худо хоҳласа, қўлимдан келганича "Андижон"га ёрдам бераман. Жамоа фан-клубини қанақалигини биламан. Бундай мухлислар қаршисида тўп суриш жуда ёқимли. Уларни ишончини қозонишга ҳаракат қиламиз.
- Янги қароргоҳда янги жамоангиз билан биринчи машғулотни ўтказдингиз. Таассуротлар қанақа?
- Коллективдагиларни барчаси оғайниларим. Ҳаммаси билан танишмиз. Барибир умумий боғламларимиз бор. Жамоага киришиб кетиш муаммо бўлгани йўқ. Машғулот жараёнлари ҳам ўша. Шундай экан, янада мослашишим қийин кечмайди. Кучлироқ бўлиб, ишончни оқлашга ҳаракат қиламиз.
- "Андижон" сафида иккинчи даврадан нима кутяпсиз?
- Олдимизга қўйилган мақсадлардан бири Осиё Чемпионлар лигасида муносиб иштирок этиш. Биринчи вазифамиз гуруҳдан чиқиш. Чемпионатда ҳам яхши ўринлардан бирини эгалламоқчимиз. Бундай футболчилар билан кучли учталикка кирса бўлади. Барчаси ажойиб ўйинчилар. Олдимизда ҳали кўп қиладиган ишларимиз бор. "Андижон" мухлислари учун яхши натижа кўрсатишга бор кучимиз билан ҳаракат қиламиз.
- ОЧЛда ҳам ўйнагансиз. "Андижон" ОЧЛ 2 да илк бор иштирок этади ва сиз ушбу турнирда жамоанинг иштирокини қандай тасаввур қиляпсиз?
- У ерда барибир даража бошқа бўлади. Битта хатони кечиришмайди. Иложи борича кам хато қилган жамоа ютади.
- Яна бир бор Максим Шацких билан ишлаш имкониятига эгасиз. Сизга ёқадиган энг афзал томонлари нимада?
- Мураббий тактик томонлама ҳам жуда яхши тайёрлайди. "Пахтакор"да ҳам кўпроқ тактика устида ишлардик. Рақибни кучли ва кучсиз жиҳатларидан келиб чиқиб тўғри таркиб танлай олади.
- "Андижон" мухлислари сизни жамоага қўшилганингиздан хурсанд. Уларга қандай гапингиз бор?
- Бизни қўллаб-қувватлашда давом этинглар. Худо хоҳласа, ҳаммаси яхши бўлади. Қўлдан келганича хурсанд қилишга ҳаракат қиламиз. "Бобур арена"да барча ишқибозларни кутиб қоламиз.
