"Пари Сен-Жермен" ҳужумчиси Гонсалу Рамуш "Ньюкасл" радарларига тушиб қолди.
"Магпилар"нинг биринчи рақамли нишони "РБ Лейпциг" 80 млн еврога сотишдан бош тортган Бенямин Шешко бўлиб қолмоқда.
"Ньюкасл" 22 ёшли словениялик футболчи учун "Манчестер Юнайтед" билан курашни давом эттирмоқда, аммо муқобил вариантларни ҳам кўриб чиқмоқда. Журналист Крейг Хоупнинг сўзларига кўра, "оқ-қоралар" Шешко бўйича музокаралар муваффақиятсизликка учраган тақдирда, Рамуш номзодига ўтиши мумкин.
Португалиялик футболчини қўлга киритиш осон бўлмайди. "ПСЖ" у билан хайрлашишни истамаяпти. 24 ёшли футболчининг парижликлар билан шартномаси 2028 йилгача мўлжалланган.
