Греция ва Ўзбекистон терма жамоалари ўртасидаги ёшлар ўртасидаги ЖЧ нимчорак финал ўйинидан кейин матбуот анжуманида иштирок этган юнонлар бош мураббийи Костас Цанас натижа адолатсиз бўлганини таъкидлади. Аммо, шунга қарамай, Ўзбекистонга қарши баҳсни инобатга олмаганда, у жамоасининг мусобақадаги иштирокидан кўнгли тўлганини таъкидлади.

"Нимчорак финалда қўлимиздан келган барча ишни қилдик. Аммо натижа адолатсиз бўлди. Шубҳасиз, футболчиларимни Туркия майдонларида ҳаракатлари учун табрикласам бўлади. Бу йигитларда юқори потенциал бор. Шунинг учун биз натижадан уялмаймиз", дейди Костас.

"Бу билан ҳаёт тугаб қолмайди. Бугунги мағлубият аламли бўлди. Ўзбекистонга қарши ўйин қийин бўлишини олдиндан билардик. Биз ўйинни яхши бошладик. Ҳисобда ортда бораётиб ҳам, ҳисобни тенглаштириш учун ўзимизда куч топа олдик. Шундан кейин ҳам ўйинни назорат қилдик. Лекин дарвозамизга белгиланган пенальти ва ўйинчимизнинг майдондан четлатилиши бизга қимматга тушди. Шундан кейин вазиятни ўзгартиришга ҳаракат қилдик. Таркибда айрим ўзгаришларни амалга оширдим. Футболда баъзида шунақаси ҳам бўлиб туради. Ўйинимизни кейинчалик таҳлил қилиб чиқамиз", дейди бош мураббий.

"Ўзбекистонни чорак финалга чиққани билан табриклайман. Кейинчалик Греция футболи ҳам мана шундай муваффақиятларга эришади, деб ўйлайман. Ҳа, биз бугун ютқаздик. Лекин жамоамиз жаҳоннинг кучли 16та терма жамоаси сафига кирди. Биз бу муваффақиятга оғир меҳнат туфайли эришдик", дея ўз сўзини якунлади Костас Цанас.