Бразилиянинг "Сантос" клуби раҳбарияти мамлакат чемпионатидаги 0:6 ҳисобидаги мағлубиятга зудлик билан реакция билдирди. "Васко да Гама" Неймар жамоасини аяб ўтирмади.
Ушбу мағлубиятдан сўнг "Сантос" бош мураббийи Клебер Хавьер истеъфога чиқарилди. Матбуот хизмати шу муносабат билан қисқа баёнот эълон қилиб, унга амалга оширган ишлари учун миннатдорчилик билдирди ва келгуси фаолиятида омад тилади.
Эслатиб ўтамиз, Хавьер жамоада иш бошлаганига эндигина 4 ой бўлганди. Бу унинг бош мураббий сифатидаги биринчи тажрибаси эди.
Айни пайтда "Сантос" мамлакат чемпионатида ўн бешинчи ўринни эгаллаб турибди (мумкин бўлган 20 та ўриндан).
