"Осасуна" Ла Лига 1-турида "Реал" меҳмони бўлиб, 0:1 ҳисобида имкониятни бой берди.
"Қаймоқранглилар"нинг ягона голи иккинчи бўлим бошида пенальтидан киритилди. "Осасуна" жамоаси бош мураббийи Алессио Лискининг фикрича, 11 метрлик жарима зарбаси нотўғри белгиланган.
"У ерда ҳеч қандай даҳшатли нарса содир бўлмагани менга аниқ эди. Вазиятни қайта кўриб чиқдим - Мбаппе Круснинг оёғини босиб олди, кейин эса Круснинг оёғи унга бироз тегиб кетди. Пенальти йўқ эди," - дея Лискининг сўзларини келтиради Goal портали.
Ла Лиганинг 2-турида "Осасуна" ўз майдонида "Валенсия"ни қабул қилади. Ўйин 24 август, якшанба куни бўлиб ўтади. "Реал" шу куни "Овьедо" меҳмони бўлади.
