Жанубий Кореянинг Инчеон шаҳрида ёпиқ иншоатларда ўтказиладиган спорт турлари ва жанг санъатлари бўйича давом этаётган Осиё ўйинларида Ўзбекистон делегацияси ҳазинаси яна икки медал билан бойиди.

Эътиборлиси, навбатдаги медаллар Осиё ўйинлари дастуридан ўрин эгаллаган миллий курашимиз бўйича қўлга киритилди.

Оғирлик вазни 66 кг.гача бўлган полвонлар мусобақасида Ватанимиз шарафини ҳимоя қилган Суҳроб Худойбердиев дастлаб чорак финалда таиландлик, ярим финалда эса суриялик полвонни енгиб, ҳал қилувчи финал беллашувида япониялик Кота Этога имкониятни бой берди ва Осиё ўйинларининг кумуш медали билан тақдирланди.

Яна бир полвонимиз Сиёвуш Бобоев (-73) нимчорак финалда Хитой Тайпейи вакилини, чорак финалда мўғилистонлик полвонни енгиб, ярим финалда эронлик Илёс Али Акбарийга имкониятни бой берди ва осиё ўйинларининг бронза медали совриндори бўлди.