Жанубий Кореянинг Инчеон шаҳрида ўтаётган ёпиқ иншоатлардаги спорт турлари ва жанг санъатлари бўйича Осиё ўйинларида курашчимиз Гулёр Отажонованинг ғалабаси шарафига Ўзбекистон делегациясининг медаллар ҳазинаси яна бир олтин медаль билан бойиди.

Хотин-қизлар ўртасида ўтказилаётган мусобақанинг 57 кг. вазн тоифасидаги спортчилар беллашувида Ватанимиз шарафини ҳимоя қилган Гулёр Отажонова ҳал қилувчи беллашувларда дастлаб таиландлик, финалда эса эронлик Сурешжани Ҳайдарийни мағлуб этиб, Осиё ўйинлари ғолиби деган шарафли номга сазовор бўлди. Унинг ғалабаси шарафига музаффар байроғимиз сарбаланд кўтарилиб, мадҳиямиз янгради.

Шу тариқа Ўзбекистонлик спортчилар қўлга киритган медаллар сони 7 тага (учта олтин, иккита кумуш ва иккита бронза) етди ва эндиликда мамлакатимиз вакиллари умумжамоа ҳисобида 45 давлат орасида 6 – ўринга кўтарилиб олдилар.