2009 йилнинг 29 августида португалиялик ҳужумчи Криштиану Роналду Мадриднинг "Реал" клуби либосидаги илк голини урган эди. Ўшандан бери роппа-роса 16 йил ўтди.
Футболчининг дебют голи Испания чемпионатининг 1-туридан ўрин олган "Депортиво"га қарши ўйинга (3:2) тўғри келди. 35-дақиқада Роналду пенальтидан унумли фойдаланди.
Роналду 2009-2018 йилларда "Реал" шарафини ҳимоя қилган. Бу вақт ичида у барча турнирларда 438 та ўйин ўтказиб, 450 та гол урди ва 131 та голли узатмани амалга оширди.
Айни дамда 40 ёшли Роналду Саудия Арабистонининг "Ан-Наср" клубида тўп сурмоқда. Ҳужумчининг клуб билан амалдаги меҳнат шартномаси 2027 йилнинг ёзигача мўлжалланган.
