Чемпионлар лигасининг умумий босқичида "ПСЖ" сафарда "Барселона"га қарши баҳс олиб боради. Бу борада ўз вақтида "Барселона" шарафини ҳам футболчи, ҳам мураббий сифатида ҳимоя қилган парижликлар бош мураббийи Луис Энрике изоҳ берди.
"Мен учун бу ҳам ижобий, ҳам салбий туйғу. Қайтиш - бу ажойиб, ахир бу менинг уйим. Шу билан бирга, чин юракдан айтадиган бўлсам, менга бошқа ҳар қандай клубдан кўра кўпроқ ёрдам берган клубга қарши ўйнаш мен учун оғриқли бўлади. Мен бу ўйиндан норозиман. Буни тушунтириш қийин," - деди Энрике матбуот анжуманида.
"Барселона" ва "ПСЖ"нинг айнан қачон тўқнаш келиши ҳозирча номаълум. Жадвал шанба куни эълон қилинади.
