"Рома"нинг ҳужумкор ярим ҳимоячиси Пауло Дибала яна муаммоларга дуч келмоқда. Август ойидаги А Серия ўйинларида икки марта захирадан майдонга тушганидан сўнг, аргентиналик футболчи "Торино"га қарши ўйинни (0:1) асосий таркибда бошлади, аммо ўйинни якунлай олмади.

Sky Sport Italia нашри тарқатган хабарга кўра Дибаланинг сонида муаммолар бор, шу сабабли у Рим дербисида "Лацио"га қарши бўладиган ўйинда майдонга тушмайди. Шу билан бирга, "бўрилар" устози Жан Пьеро Гасперини туринликларга қарши ўйиндан кейин дастлаб Дибалда кичик муаммолар борлигини, бу борада хавотирга ўрин йўқлигини таъкидлаганди. Кўринишидан, аҳвол бироз ёмонроқ.

"Рома" уч турдан сўнг 6 очко жамғариб, бешинчи ўринни бўлишиб турибди.