Ўзбекистон U-16 терма жамоаси бош мураббийи Сергей Чигодаев Черногорияга қарши бўлиб ўтган ўртоқлик ўйинидан (3:2) сўнг ўз фикрларини билдириб ўтди.

Бугунги учрашув ҳақида:
— Бугунги ўйин биз учун қийин кечди. Чунки рақибимиз жисмоний жиҳатдан кучли, уларга қарши яккакурашларда бироз қийинчиликка дуч келдик. Лекин бизнинг футболчилар тезкор ва техник жиҳатдан рақибдан устунлик қилишди. Шу сабабли бугунги учрашувда ғалаба қозона олдик.

Биринчи бўлимда футболчиларимиз бироз ҳаяжонланишди. Бироқ иккинчи бўлимда барчасини назорат қила бошладик. Болалар ҳар қандай жамоага қарши ўйнай олишларини намойиш этишди.

Навбатдаги ўйинларга тайёргарлик ҳақида:
— Албатта бу ўйинни таҳлил қилиб чиқамиз. Камчиликлар устида ишлаймиз, нимада хато қилдик, устун жиҳатларимиз қандай эди — уларни кўриб чиқамиз. Иккинчи ўйинга янада яхши тайёргарлик кўрамиз ва ғалаба қозонишга ҳаракат қиламиз.