2026 йилда шахмат тожи учун навбатдаги чемпионлик баҳси бўлади. Амалдаги чемпион — Домараджу Гукешга рақиб эса даъвогарлар ўртасидаги турнирда аниқланади.
Даъвогарлар турнирида 8 шахматчи иштирок этади. Саккиз йўлланмадан биттаси FIDE Circuit 2025 ёрдамида аниқланади.
FIDE Circuit нима?
Бу — йил давомида FIDE мезонига мос йирик турнирларда тўпланган очколар йиғиндиси. Мавсум охирида энг кўп очкога эга бўлган, аммо бошқа йўл билан ҳали йўлланма қўлга киритмаган шахматчи 2026-йилга Номзодлар турнирига йўлланма олади. Якуний ҳисобда ҳар бир ўйинчининг энг яхши етти натижаси (классик, рапид ва блиц комбинацияси бўйича) инобатга олинади.
FIDE Circuit 2025 — янгиланган рейтинги қуйидагича:
1. Праггнанандҳа — 107.00 балл
2. Аниш Гири — 81.18
3. Маттиас Блюбаум — 63.94
4. Винсент Кеймер — 55.83
5. Нодирбек Абдусатторов — 51.99
6. Магнус Карлсен — 43.96
Абдусатторовнинг имконияти қандай?
— Аниш Гири ва Маттиас Блюбаум FIDE Grand Swiss орқали аллақачон Номзодлар турнирига йўлланма олди, шунинг учун улар Circuit пойгасидан чиқарилади. Амалда пойга Праггнанандҳа, Кеймер ва Абдусатторов ўртасида давом этмоқда.
— Агар Праггнанандҳа ёки Кеймер кейинчалик Жаҳон кубоги орқали ҳам йўлланма олса, Circuit йўлланмаси навбатдаги мос номзодга ўтади. Бу сценарийда Нодирбекнинг имконияти янада ортади.
— Нодирбек учун энг тўғри йўл қолган Circuit мусобақаларида, айниқса классик тоифа турнирларида кучли натижалар кўрсатиш. Классик турнирлар кўпроқ очко беради ва “энг яхши етти натижа” кўрсаткичи сезиларли яхшиланади.
Ҳозир Нодирбек бешинчи ўринда, бироқ Гири ва Блюбаум пойгадан чиқарилишини инобатга олсак, у реал пойгада учинчи ўрин атрофида. Жаҳон кубогидаги ажойиб юриш ёки йилнинг қолган қисмидаги турнирлардаги юқори натижалар орқали Абдусатторов Номзодлар турнирига йўлланма олиши мумкин!
