2026 yilda shaxmat toji uchun navbatdagi chempionlik bahsi bo‘ladi. Amaldagi chempion — Domaradju Gukeshga raqib esa da’vogarlar o‘rtasidagi turnirda aniqlanadi.
Da’vogarlar turnirida 8 shaxmatchi ishtirok etadi. Sakkiz yo‘llanmadan bittasi FIDE Circuit 2025 yordamida aniqlanadi.
FIDE Circuit nima?
Bu — yil davomida FIDE mezoniga mos yirik turnirlarda to‘plangan ochkolar yig‘indisi. Mavsum oxirida eng ko‘p ochkoga ega bo‘lgan, ammo boshqa yo‘l bilan hali yo‘llanma qo‘lga kiritmagan shaxmatchi 2026-yilga Nomzodlar turniriga yo‘llanma oladi. Yakuniy hisobda har bir o‘yinchining eng yaxshi yetti natijasi (klassik, rapid va blis kombinasiyasi bo‘yicha) inobatga olinadi.
FIDE Circuit 2025 — yangilangan reytingi quyidagicha:
1. Praggnanandha — 107.00 ball
2. Anish Giri — 81.18
3. Mattias Blyubaum — 63.94
4. Vinsent Keymer — 55.83
5. Nodirbek Abdusattorov — 51.99
6. Magnus Karlsen — 43.96
Abdusattorovning imkoniyati qanday?
— Anish Giri va Mattias Blyubaum FIDE Grand Swiss orqali allaqachon Nomzodlar turniriga yo‘llanma oldi, shuning uchun ular Circuit poygasidan chiqariladi. Amalda poyga Praggnanandha, Keymer va Abdusattorov o‘rtasida davom etmoqda.
— Agar Praggnanandha yoki Keymer keyinchalik Jahon kubogi orqali ham yo‘llanma olsa, Circuit yo‘llanmasi navbatdagi mos nomzodga o‘tadi. Bu ssenariyda Nodirbekning imkoniyati yanada ortadi.
— Nodirbek uchun eng to‘g‘ri yo‘l qolgan Circuit musobaqalarida, ayniqsa klassik toifa turnirlarida kuchli natijalar ko‘rsatish. Klassik turnirlar ko‘proq ochko beradi va “eng yaxshi yetti natija” ko‘rsatkichi sezilarli yaxshilanadi.
Hozir Nodirbek beshinchi o‘rinda, biroq Giri va Blyubaum poygadan chiqarilishini inobatga olsak, u real poygada uchinchi o‘rin atrofida. Jahon kubogidagi ajoyib yurish yoki yilning qolgan qismidagi turnirlardagi yuqori natijalar orqali Abdusattorov Nomzodlar turniriga yo‘llanma olishi mumkin!
