Яқинда "Астон Вилла" клуби ўзининг спорт директори Мончи билан ҳамкорликни тўхтатишга қарор қилгани маълум бўлди. Бу ҳақда яқин кунларда расман эълон қилиниши кутилмоқда, бироқ испаниялик мутахассиснинг ўрнини ким эгаллаши мумкинлиги ҳақида аллақачон хабарлар чиққан.

Журналист Фабрицио Романонинг хабар беришича, Мончининг ўрнига асосий номзодлардан бири бу ёзда "Реал Сосьедад" клубини тарк этган собиқ спорт директори Роберто Олабе ҳисобланади. Ҳозирги пайтда бу масала юзасидан ички музокаралар олиб борилмоқда.

Таъкидлаш жоизки, Олабе бошқаруви даврида "Реал Сосьедад" ўттиз йилдан ортиқ вақтдан сўнг илк бор йирик совринни қўлга киритиб, 2021 йилги Испания кубогида ғалаба қозонган эди.