"Барселона" бош мураббийи Ханс-Дитер Флик жамоадаги жароҳатлар билан боғлиқ вазиятга баҳо берди.
Пайшанба куни каталонияликлар Ла Лига доирасида сафарда "Реал Овьедо"ни мағлуб этди (3:1). Учрашувни жароҳат олган Ламин Ямал, Гави, Фермин Лопес ва Алехандро Бальде ўтказиб юборди, шунингдек, дарвозабон Марк-Андре тер Штеген узоқ вақтдан бери лазаретда. Баҳснинг иккинчи бўлимида жароҳат олганликда гумон қилинаётган яна бир муҳим футболчи - Рафинья Диас захирага олинди.
"Ҳозирда бизга бир қатор футболчилар етишмаяпти, аммо клуб трансфер бозорида қанчалик сифатли иш олиб борганини ҳам кўришимиз мумкин, чунки бизда жароҳатланганларнинг ўрнини босадиганлар бор," - деди Флик матбуот анжуманида.
Якшанба куни "Барса" Испания чемпионатининг 7-тури доирасида "Реал Сосьедад"га қарши майдонга тушади.
