"Ливерпуль" дарвозабони Алиссон Чемпионлар лигасининг "Галатасарой"га қарши ўйинни охиригача якунлай олмади. The Athletic нашри хабар қилишича, Алиссон тизза ости пайи жароҳати туфайли ноябрь ойидаги терма жамоалар ўйинлари танаффусигача майдонларга қайта олмаслиги кутилмоқда.

"Ливерпуль" ҳозирча Алиссоннинг тикланиш муддатини эълон қилгани йўқ. Бу ҳақда жамоанинг бош мураббийи Арне Слот жума кунги матбуот анжуманида аниқ маълумот бериши кутилмоқда.

Илгари Слот Алиссоннинг шанба куни "Челси"га қарши ўйнамаслигини таъкидлаган эди. Шунингдек, дарвозабон Бразилия терма жамоасининг октябрь ойидаги йиғинига чақирилган футболчилар рўйхатига киритилмаган.