Mundo Deportivoнинг хабар беришича, Суперлига ташкилотчилари Чемпионлар Лигасига янги формат жорий этиш ташаббуси билан чиққан.

УЕФА, A22 (Суперлигини ташкил этувчи компания), «Барселона» ва «Реал Мадрид» вакиллари сўнгги саккиз ой давомида тўлиқ махфийликда музокара олиб боришган. Декабрдан буён томонлар етти марта учрашган, жумладан УЕФА офисларида ҳам.

Ҳамкорликнинг асосий мақсади – ҳозирги турдаги Чемпионлар Лигаси форматида барча иштирокчиларни қониқтира оладиган эволюцион ўзгаришлар қилиш ва ихтилофларни олдини олиш.

Суперлига ташаббускорлари УЕФАга икки муҳим таклифни тақдим этган:

1. Бутун дунё бўйлаб ўйинларни намойиш этиш учун бепул платформани яратиш (телевизор орқали ҳам),

2. Ҳозирги ЕЧЛ форматига ўхшаш, аммо унданда томошабоп тарзда ислоҳ этилган тизим.

Таклифга кўра, барча иштирокчилар УЕФА рейтинги асосида икки гуруҳга бўлинади (18 тадан жамоа):

кучли клублар – биринчи гуруҳ,
нисбатан кучсизлари – иккинчи гуруҳ.

Биринчи гуруҳдан энг кўп очко тўплаган 8 жамоа тўғридан-тўғри 1/8 финалга чиқади. Кейинги саккизлик эса иккинчи гуруҳдан чиқадиган 8 кучли клуб билан плей-офф босқичида тўқнаш келади.

Шу йўл билан, биринчи босқич ўйинларининг умумий савияси ошиши ва иккинчи гуруҳ клубларига ҳам ғалаба қозониш имкони яратилиши кутиляпти.

Трансляциялар учун Суперлига UNIFY платформасини таклиф қилмоқда:

a) реклама билан – бепул версия,
b) рекламасиз – премиум версия.

Mundo Deportivo таъкидлашича, УЕФА билан Суперлига ташаббускорлари ўртасидаги муносабатлар охирги вақтларда анча яхшиланган.

Янги формат 2027 йилдан, телевидение ҳуқуқлари савдосининг янги цикли бошланганда йўлга қўйилиши мумкин.