"Барселона"да Рональд Куманнинг ёрдамчиси бўлиб ишлаган Хенрик Ларссон Александр Исакнинг амалга ошмай қолган трансферини эслади.
Швециялик мутахассис Каталония клубида 2020 йил августидан 2021 йил октябригача ишлаган. У раҳбариятга ўша пайтда "Реал Сосьедад" сафида тўп тепган ҳамюрти Исакка эътибор қаратишни маслаҳат берганини айтди.
"Исак ҳақида "Барселона"да ишлаганимда гапирганман. Мендан яхши ҳужумчилар рўйхатини тузишни сўрашди - унга Александрни киритдим. Айтиш жоизки, у ерда Левандовски ҳам бўлган," - дея Ларссоннинг сўзларини келтиради испан ОАВ.
Роберт Левандовски 2022 йилнинг ёзида, Хави Эрнандес давридаёқ "Барселона"га кўчиб ўтганди, Александр Исакни эса қўлга киритишнинг имкони бўлмади. Жорий йилнинг ёзида "Ливерпуль" 25 ёшли швецияликни "Ньюкасл"дан 145 млн еврога сотиб олган эди.
