Испания Қироллик футбол федерацияси (RFEF) президенти Рафаэль Лусан “Барселона” ва миллий терма жамоа ўртасидаги Ламин Ямал атрофидаги вазият бўйича фикр билдирди.

Сентябрь ойидаги терма жамоалар ўйинларидан кейин “Барселона” бош мураббийи Ханс-Дитер Флик Испания терма жамоасини танқид қилган эди. Унинг фикрича, “Қизил Фурия” футболчилар соғлиғига етарлича эътибор бермаяпти. Немис мутахассиси Ямал жисмоний ноқулайлик ҳис қилганига қарамасдан, уни ўйинларга жалб этилганидан норози бўлган.

ОАВнинг ёзишича, Испания терма жамоаси бош мураббийи Луис де ла Фуэнте октябрь ойидаги ўйинлар учун Ямални чақирган, гарчи футболчининг ўзи соғлиғи сабаб чақирилмасликни сўраган бўлса ҳам.

“Барселона" — буюк клуб, ва биз улар билан ҳамкорликда ишлаймиз. Бундай турдаги баҳс ва шов-шувларга ортиқча аҳамият бериш шарт эмас, вазиятни адолатли баҳолаш керак.

Агар тиббий хулоса мавжуд бўлса, ҳамма нарса унга асосланиб баҳоланиши лозим. Энг муҳими — Испания эркаклар ва аёллар терма жамоалари дунё рейтингида биринчи ўринда. Мен яхши муҳит ва тинчлик бўлишини хоҳлайман,” — деди Рафаэль Лусан Cadena SER нашрига берган изоҳида.