“Бавария” ҳужумчиси Харри Кейннинг амалдаги шартномасида 2026 йил ёзи учун 65 миллион евро миқдорида товон тўлови кўзда тутилган. Аммо бу бандни фақат 2026 йил 31 январгача фаоллаштириш мумкин. Бу ҳақда Bayern & Germany нашри журналистлар Кристиан Фальк ва Тоби Альтшаффл маълумотларига таяниб, ижтимоий тармоқда хабар берди.

Манба маълумотича, мюнхенликлар режаси — мазкур банднинг амал қилиш муддати тугашини кутиш ва шундан сўнг Кейн билан янги шартнома борасида музокараларни фаоллаштиришдан иборат. “Бавария” раҳбарияти ҳужумчи Англияга қайтишни истамайди, деб умид қилмоқда.

Кейн жамоанинг энг кўп маош олувчи футболчиси ҳисобланади — унинг йиллик даромади 24 миллион еврони ташкил этади. Германия гранди ҳужумчининг маош ошириш ниятида эмас. “Бавария” харажатларни қисқартириш сиёсатини юритмоқда. Шунингдек, Кейннинг амалдаги шартномаси тугаганда у 34 ёшга тўлади.